http://xpam.kiev.ua/components/com_gk2_photoslide/images/thumbm/246687zastavka_1n.jpghttp://xpam.kiev.ua/components/com_gk2_photoslide/images/thumbm/538211zastavka_2n.jpghttp://xpam.kiev.ua/components/com_gk2_photoslide/images/thumbm/559976zastavka_3n.jpg
Авторизация
Киевская Митрополия Украинской Православной ЦерквиХрам мученика Валерия
Собрание проповедей отца Андрея Ткачёва
Зазимський Благовісник - сайт храму Воскресіння Христового с. Зазим'є
Центр у Справах Сім'ї та ЖінокХрам
Наш баннер:
Храм свв. мчч. Адриана и Наталии

<a target="_blank" href="http://xpam.kiev.ua/"><img src="http://xpam.kiev.ua/images/stories/banner/ban2.png" alt="Храм свв. мчч. Адриана и Наталии" border="0" width="88" height="31" /></a>

Служба святой мученице Татиане

 Великая Вечерня, совершаемая накануне праздника.

 
На Господи воззвах стихиры, глас 8:
 
Стих:Из глубины воззвах к Тебе, Господи, Господи услыши глас мой.
Господи, аще и креститися претерпел еси, плотию безгрешне, освободити мир от греха хотя,/ но Бога тя мы ведуще славим,//крестився бо избавил от работы души наша.
 
Стих:Да будут уши Твои внемлюще гласу моления моего.
Господи, егда на Иорданския струи воплотився пришел еси,/ да освятиши воду славным Твоим Крещением,/ Иоанну твои верх преклонити изволил еси,// и крещаешися от раба да спасаеши души наша.
 
Стих:Аще беззакония назриши, Господи, Господи, кто постоит?/ Яко у Тебе очищение есть.
Господи, спасти восхотев от лести мир,/ егоже создал еси,/ из Неискусобрачныя Девы воплотитися изволил еси/ и Адама от тли избавил еси, яко Человеколюбец,//и крестився же даровал еси просвещение душам нашим.
 
Стих:Имене ради Твоего претерпех Тя, Господи, претерпе душа моя в слово Твое,/ упова душа моя на Господа.
Егда духа светом осиеваема богатно/ богатство возненавидела еси,/ едино возлюбивши небесное/ в мученическую крепость яве облеклася еси/ и к безмерным болезнем отлучалася еси./ Темже врага низложивши, победы исплела еси венцы,//мученице страстотерпице преславная.
 
Стих:Яко у Господа милость и многое у Него избавление,/ и Тои избавит Израиля от всех беззаконий его.
Егда смрад плоти и греха пламень честная угасила еси,/ росою божественнаго духа, содействующаго тебе,/ тогда звери обуздала еси посреде судища,/ тело твое предавши на раны мужески./ Темже врага низложивши, победы исплела еси венцы,//о Татиано богоблаженная.
 
Стих:Яко увердися милость Его на нас/ и истина Господня пребывает во век.
Ни меч, ни огнь, ни раны,/ ни скорби, ни глад, ни всякии вид мучения,/ твоего еже ко Господу притупиша рачения:/ разженным бо сердцем Того ищущи./ Вся видимая единощи оплевала еси, мученице,/ и внутрь Божественнаго чертога вселилася еси,//невеста Царя всех бывши.
 
Слава, глас 6:
Одесную Спаса предста дева,/ и страстотерпица, и мученица Татиана,/ одеяна добродетельми, непобежденна,/ и преукрашенна елеем чистоты,/ и кровию страдания,/ и вопиющи к Нему радостно, свещу держащи:/ В воню мира Твоего текох, Христе Боже,/ яко уязвихся Твоею Любови аз,/ не отлучи мене, Женише Небесныи./ Тоя молитвами,//низпосли нам, Всесильне Спасе, милости Твоя.
 
И ныне, глас 5: Зряще Тя естество всякое земнородных нага в водах,/ Содетеля, Крещения просяща,/ изменяшеся страхом и ужасашеся./ Предтеча же трепетом содержим бяше,/ не смея приближитися Тебе./ Море побеже, Иордан струи возврати,/ горы взыграшеся, зряще,/ и Ангельския силы удивляхуся, глаголюще:/ о, чудесе!/ Спас обнажается,//одеяти хотя во спасение человеки и обновление.
 
Пророчества Исаиина чтение (глава 43):
Тако глаголет Господь: вси языцы собрашася вкупе, и соберутся князи от них. Кто возвестит сия в них, или яже от начала, кто слышана сотворит вам. Да приведут свидетели своя, и оправдятся, и да услышат, и да рекут истину. Будите ми свидетели, и аз свидетель, глаголет Господь Бог, и отрок, егоже избрах, да познаете и веруете Ми, и разумеете, яко. А з есмь: прежде Мене не бысть ин Бог, и по Мне не будет. Аз есмь Бог, и несть разве Мене спасаяи. Аз возвестих, и спасох, уничижих, и не бе в вас чуждии. Вы Мне свидетелие, и Аз Господь Бог, и еще от начала Аз есмь: и несть от рук Моих избавляяй. Сотворю, и кто отвратит то. Сице глаголет Господь Бог, избавляяй вас Святый Израилев.
Премудрости Соломоновы чтение (глава 3):
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение. Они же суть в мире. Ибо пред лицем человеческим аще и муку примут, упование их бессмертия исполнено. И вмале наказаны бывше, великими благодетельствовани будут, яко Бог искуси я, и обрете их достоины Себе. Яко злато в горниле, искуси их, и яко всеплодие жертвенное, прият я. И во время посещения их воссияют, и яко искры по стеблю потекут. Судят языком, и обладают людьми, и воцарится Господь в них во веки. Надеющиеся на Нь разумеют истину, и вернии в любви пребудут Ему. Яко благодать и милость в преподобных Его, и посещение в избранных Его.
 
Премудрости Соломоновы чтение (глава 4):
Праведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живыи посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, а парение похоти пременяет ум незлобив. Скончався вмале, исполни лета долга: угодна бо бе Господи душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.
 
Стихира на литии, глас 4:
Девства добротами/ и мучении кровьми/ душу твою украсивши, мученице славная, Татиано,/ вручилася еси Создавшему,/ сохраняющему тебя во век истинно,/ о сем лукавствующи/ с воинствы архангел и ангел,/ апостол же и пророк,//и мученик ликостоянии, всехвальная.
 
Слава, и ныне, глас 8:
Днесь тварь просвещается,/ днесь всяческая веселятся,/ небесная вупе и земная,/ ангелы и человецы смешаются,/ идеже во царево пришествие, и чин приходит./ Тецем убо на Иордан, и видим вси Иоанна,/ како крещает верх нерукотворенный и безгрешный./ Темже ангельский глас припевающе, согласно возопием:/ явися благодать Божия спасительная всем человеком,//озирающи и подающи верным велию милость.
 
Стихиры на стиховне, глас 4
Подобен: Яко добля:
Мучительскому шатанию и наглому суровству/ помыслом супротивлышися мужемудренно,/ будщих предвидящи наслаждение, богомудренная,/ пребывающее присно во веки неподвижимо,/ еже и получила еси,/ от земли преставльшися к чертогам небесным,//и лику неразоримому, славная.
 
Стих:Дивен Бог во святых своих, Бог Израилев.
Царствия благолепие/ и доброту красную видити сподбилася еси жениха твоего Христа,/ украшена ранами твердаго твоего страдания,/ и источнику благих достоино приближилася еси./ Отонудуже Божественнаго веселия плод богатно прияла еси, блаженная,//и бессмертную славу.
 
Стих:В церквах благословите Бога,/ Господа от источник Израилевых.
Ни иго работное,/ ни слабость женская,/ ни глад, ни раны запяша ти/ мученичестей твердости уподобитися, всеславная,/ усердием души муки претерпела еси./ Отонудуже получила еси небесныи чертог,/ и венцем благодати украсилася еси/ предстоящи Зиждителю твоему.
 
Слава, глас 5
Самоподобен: Радуися Живоносныи Кресте:
Девства твоего красоты восхоте Царь Славы Христос,/ яко непорочну тя невесту Себе обручи,/ совокуплением нетленным,/ ибо волею Своею подав доброте твоеи силу,/ на враги же и страсти непобедиму показа,/ претерпевшу раны горькия, и муки свирепыя,/ сугубым венцем увязе тя,/ и постави одесную себе яко царицу испещрену/ Того моли, мученице честная и многострадальная Татиано,//певцем твоим спасение и жизнь подати и велию милость.
 
И ныне, глас 6 (самоподобен):
Воспоим вернии,/ еже о нас Божия благодеяния величество,/ о нашем бо прегрешении быв человек,/ нашим очищением очищается во Иордане,/ един Чистый и Нетленный,/освящаяй мене и воды,/ и главы змиев сокрушаяй в воде./ Почерпем убо воду с веселием, братие,/ благодать бо Духа верно почерпающим/ невидимо подавается от Христа Бога//и Спаса душ наших.
 
Тропарь святыя, глас 4:
Агница Твоя Иисусе Татиана/ зовет велиим гласом:/ Тебе, Женише мои, люблю/ и, Тебе ищущи, страдальчествую,/ и сраспинаюся и спогребаюся крещению Твоему,/ и стражду Тебе ради,/ яко да царствую в Тебе и умираю за Тя,/ да и живу с Тобою,/ но яко жертву непорочную приими мя, с любовию пожершуюся Тебе.//Тоя молитвами, яко милостив, спаси души наша.
 
Тропарь праздника, глас 1:
Во Иордане крещающуся Тебе, Господи,/ Троическое явися поклонение:/ Родителев бо глас свидетельствовавше Тебе,/ возлюбленнаго Тя Сына именуя,/ и Дух в виде голубине,/ извествовавше словесе утверждение,/ явлейся, Христе Боже,//и мир просвещей, слава Тебе.
 
Утреня
По 1-ои стихологии седален, глас 5.
Подобен: Собезначалъное:
Благочестно поработившися Вседержителю, злочестивому же мучителю не поработилася еси, честная,/ но претерпела еси твердо темное заключение, и ран разжжение,/ и преставилася еси к Богу, богомудрая мученице Татиано.// Молися о нас, совершающих память твою.
Слава, и ныне, глас 4.
Подобен: Удивися Иосиф:
Иордане реко,/ что удивился еси, зря Невидимаго нага?/ Видех и вострепетах, рече,/ и како бо Сего не хотех устрашитися и зайти?/ Ангели Его устрашишася зряще,/ ужасеся Небо, и земля вострепета,/ и смятеся море, и вся видимая и невидимая — //Христос явися на Иордане освятити воды.
По 2-ой стихологии седален, глас 1.
Подобен: Гроб Твой:
Мучений огнь духа росою погасила еси, честная,/ и к свету преставилася еси божественному и невещественному,/ и по кончине блаженней источаеши исцелений капли, Татиано,//оставляющи разжжение страстей силою духовною.
Слава и ныне, глас 8.
Подобен: Свирелеи пастырских:
Крещается Христос, просвещаяй мир,/ с высоты Отец свидетельствова, глаголя:/ Сей есть Сын Мой, в Немже благоизволих,/ Того послушайте./ Сей есть просвещаяй вселенную благоутробием Своим, //крестивыйся и спасый яко Бог
род человеческий.
 
Величание.
 
Величаем тя,/ страстотерпице Христова Татиано,/ и чтем честная страдания твоя,/ яже за Христа//претерпела еси.
Псалом избранныи.
Бог наш прибежище и сила. Помощник в скорбех, обретших ны зело. Сего ради не убоимся,/ внегда смущается земля. Боже, кто уподобится Тебе, да не премолчиши,/ ниже укротиши, Боже.
Прокимен, глас 4:
Дивен Бог во святых своих,/ Бог Израилев.
Стих: В церквах благословите Бога от источник Израилевых.
Евангелие от Матфея (зачало 36):
 
Рече Господь Своим учеником: Се, Аз посылаю вас, яко овцы посреде волков: будите убо мудри яко змия, и цели, яко голубие. Внемлите же от человек: предадят бо вы на сонмы, и на сборищах их биют вас. И пред владыки же и цари ведени будете Мене ради, во свидетельство им и языком. Егда же предают вы, не пецытеся, како или что возглаголете. Не вы бо будете глаголющии, но Дух Отца вашего глаголяй в вас. Предаст же брат брата на смерть и отец чадо: и востанут чада на родители и убиют их. И будете ненавидими всеми имени Моего ради: претерпевый же до конца, той спасен будет.
 
По 50-м псалме, стихира, глас 6:
Одесную Спаса предста дева,/ и страстотерпица и мученица, Татиана,/ одеяна добродетельми,/ непобеждена, и преукрашена елеем чистоты,/ и кровию страдания,/ и вопиющи к нему радостно,/ свещу держащи:/ в воню мира Твоего текох, Христе Боже,/ яко уязвихся Твоею любовию аз,/ не отлучи мене, Женише Небесный.//Тоя молитвами низпосли нам, Всесилъне Спасе, милости Твоя.
Канон праздника (см. минея январь).
Канон святыя, творение Игнатиево, глас 2:
 
Песнь 1
Ирмос (праздника):Глубины открыл есть дно,/ и сушею своя влечет,/ в неи покрыв противныя,/ крепкии во бранех Господь,// яко прославися.
Святая мученице Татиано, моли Бога о нас.
Мученическими озарена светлостьми,/ чистому предстоиши, мученице, Жениху твоему,/душетленных прегрешении просящи избавитися хвалящим тя.
Святая мученице Татиано, моли Бога о нас.
Богатство тленное, мученице, совершенно пренебрегла еси,/ на небесех нетленное и пребывающее ищущи усердно/ и радующися, прошла еси мученическое страдание.
Святая мученице Татиана, моли Бога о нас.
К ранам, к болезнем и биением многовидным/ безбоязненно, мученице, отлучилася еси:/ споспешествующую бо имела еси благодать Спасову и укрепляющую тя.
Слава Отцу, и Сыну, и Святому Духу и ныне и присно и во веки веков. Аминь.
Богородичен: Источник безстрастия рождшая,/ уязвеннаго страстьми, Отроковице, исцели/ и огня вечнаго исхити мя,//едина Богоблагодатная.
Катавасия (праздника):Грядите, людие,/ поим песнь Христу Богу,/ раздельшему море и наставлыпему люди, яже изведе из работы египетския,//яко прославися.
Песнь 3
Ирмос:Крепость даяй царем нашим Господь/ и рог помазанных Своих возносяй/ от Девы раждается, грядет же ко Крещению./ Тому вернии возопиим://несть свят, яко Бог наш.
Не поколеба столпа твоего сердца стекшее мук треволнение,/ утвердися бо на камени любве Христовы, всехвальная,/к Немуже взывала еси//яко: несть свят, паче Тебе, Господи.
Человеческую немощь Понесый,/ впери силою немощь твою на некрепкаго змия./ Тем, мученице, на землю низвергла еси, верно зовущи//яко: несть свят, паче Тебе, Господи.
Потоки иссушила еси беззакония струями кровеи твоих, блаженная,/ сладости же потока ныне наслаждаешися/ и во Свете Невечернем обитаеши, зовущи//яко: несть свят, паче Тебе, Господи.
Богородице: Зачатие и рождество Твое паче слова,/ веки бо Создавшаго словом родила еси,/ Избавльшаго бессловесия мира концы, Отроковице Неискусомужная,//Егоже моли всегда, еже спасти нас.
Катавасия:На камени мя веры утвердив,/ расширил еси уста моя на враги моя,/ возвесели бо ся дух мои, внегда пети:/ несть свят, якоже Бог наш,//и несть праведен, паче Тебе, Господи.
Кондак, глас 4
Явился еси днесь вселенней,/ и свет Твои, Господи, знаменася на нас,/ в разуме поющих Тя:/ пришел еси и явился еси,//Свете Неприступный.
Икос
Галилеи язычестей, Завулонстей стране и Неффалимстей земли,/ якоже рече пророк, Свет велик воссия, Христос./ Омраченным светла явися Заря, из Вифлеема блистающая,/ паче же из Марии Господь всей вселеннеи воссиявает лучи, Солнце правды./ Темже, иже от Адама назии, приидите вси, облечемся в Него, да согреемся,/ покрывает бо нагия и просвещает темныя.//Пришел еси и явился еси Свет Неприступный.
Седален, глас 4
Подобен: Скоро предвари
Сугуб совершивши, мученице, подвиг на земли,/ сугуб и венец сподобилася еси прияти от руки Жениха твоего:/ постилася еси, страсти плотския обуздающи,/ пострадавши же законно, врага низложила еси.//Темже мольбами твоими спаси ны от напастей.
Слава, и ныне, глас и подобен тоиже:
Светом, яко ризою, одеяйся,/ струями одевается Иорданскими Христос Бог наш,/ свыше свидетельствующу Отцу сопрестольнаго,/ доле пришедшу Духу славы://Той есть Просвещаяй и Освещаяй нас.
 
Песнь 4
Ирмос:Услышах, Господи,/ глас Твои, Егоже рекл еси,/ глас вопиющаго в пустыни,/ яко возгремел еси над водами многими,/ Твоему свидетельствуя Сыну,/ весь быв сошедшаго Духа, возопи:/Ты еси Христос, Божия мудрость и сила.
Красно душевное устроение благолепием благочестия Татиана носящи,/ еще же мучения светом преславно сияющи,// к чистому Жениху вселяется.
Железом твое лице стружущия пребеззаконныя/ невидением Небеснии Ангели мучаху,/ посланнии к твоеи от Бога, мученице, помощи,//иже твоему терпению удивишася.
Законно Христа проповедающи, победила еси пребеззаконнующия,/ жертва же непорочна благоприятна совершеннейшая Тому принеслася еси, взывающи://Тебе любящи, Спасе, закалаюся.
Богородичен: Ко пристанищу тихому мя направи, Богоневесто Всесвятая:/ буря бо мя волнует и смущение греха люте,//ветры колеблемь лукавых духов, оскорбляющих мя.
Катавасия:Пою Тя, слухом бо, Господи,/ услышах и ужасохся:/ до мене бо идеши, мене ища, заблудшаго./ Тем многое Твое снисхождение, еже на мя, прославляю,// Многомилостиве.
 
Песнь 5
Ирмос:Иисус, живота Начальник,/ разрешити осуждение грядет/ Адама первозданнаго,/ очищений же яко Бог не требуя,/ падшаго очищает во Иордане:/ в нем же вражду убив,//преимущ всяк ум мир дарует.
Твою честную и блаженную страсть подражающи,/ бесстрастием Тебе сочетавшаяся страждет преусердно,/ на уды ссекаемая, Жизнодавче Христе, зовущи://иного, разве Тебе, бога не знаю.
Страх Божии во утробе мыслию приемши,/ дух спасительнаго исповедания и мучения/ родила еси преславно, доблемудрая, твердым страданием//и сопротивная начала посрамила еси.
Светлыми сияеши зарями, уясняема Духа Святаго светолитием,/ и озаряеши верных сердца, греховный мрак разоряющи, мученице,// страстотерпице Христова досточудная.
Богородице: Светлый Солнца Облаче, осияй ми зарю,/ решащу мрак моих прегрешении,/ даждь ми руку, впадшему в тину греховную,//воздвигни мя, лежащаго, Едина падшаго Адама исправление.
Катавасия:Просвещение во тьме лежащих,/ спасение отчаянных, Христе Спасе мои,/ к Тебе утренюю, Царю мира,/ просвети мя сиянием Твоим:// иного бо, разве Тебе, Бога не знаю.
 
Песнь 6
Ирмос:Глас Словесе, светильник Света, денница Солнца, Предтеча, в пустыни,/ — покаитеся,— всем вопиет людем, — и предочиститеся:/ се бо предстоит Христос,//от тли мир избавляяй.
На древе яко позна простерта Тя мученица честная,/ терпит повешение и строгания телесная//за любовь Твою, Всемощне.
Свирепейшии звери устыдешася посреде тризнища мужески страждущия тя,/ якоже Феклы первее первомученицы,//еяже ревность стяжала еси, приснопамятная.
Представше Небеснии Ангели посреде темницы, тя светом осияша,//от болезнеи изымающе и яко Божию агницу прославляюще.
Богородичен: От всех родов избра Тя, доброту Иаковлю,/ Юже возлюби Творец, Всенепорочная,//и из Тебе, воссияв, явися.
Катавасия:В бездне греховнеи валялся,/ неизследную милосердия Твоего призываю бездну://от тли, Боже, мя возведи.
 
Кондак, глас 4
Светло во страдании твоем возсияла еси, страстотерпице,/ от кровей твоих преиспещрена,/ и, яко красная голубица, к небеси возлетела еси, Татиано,//тем же моли присно за чтущия тя.
Икос
Уневестившуюся Христу мучением Татиану/ сошедшеся почтим достоино:/ яко да тоя молитвами, душетленныя пагубы избавльшеся,/ губительства, труса и падежа,/ житие во смирении проводим,/ сподобльшеся со всеми святыми, от века Богу благоугодившими,/ ходити во свете и пети с сими:/ удивил еси, Спасе, Твоя милости всем человеком,/ верою хвалящим ю./ Тем же зовем ей://моли непрестанно о всех нас.
Песнь 7
Икос:Юноши благочестивыя, пещи огненней приобщившияся,/ шумящ дух росный невредимы сохрани,/ и Божия Ангела снисхождение./ Темже в пламени орошаеми, благодарственно воспеваху://препетыи отцев Господи и Боже, благословен еси.
Благомощно непобедимая, сечема,/ сосцев отъятие претерпела еси терпеливейше,/ огнем же небесным, мученице, попалила еси чтити не хотящия Бога,// Егоже вся тварь поет, славящи.
В сердце носящи огнь Божественныя любве, непорочная пламень попра,/огня подоборабнаго не ужасеся,//отроков образующи древних и мужество и крепость.
Зверей свирепство тебе повинеся, львов зияния невредно преминула еси,/ Богу тя прославльшу, Того прославившую,//Егоже страдания твоею исполняющи плотию, всехвальная.
Богородичен: Жизнь Ипостасную нам рождши, смертию смерть яве потребльшую,/ страсти умертви плоти нашея, верою чтущих Тя, Чистая,//яко Богородицу и Бесславную.
Катавасия:Богопротивное веление беззаконнующаго мучителя/ высок пламень вознесло есть./ Христос же простре благочестивым отроком росу духовную,//Сый благословен и препрославлен.
 
Песнь 8
Ирмос:Тайну преславную вавилонская показа пещь,/ источившая росу,/ яко струями имяше невещественный огнь восприяти Иордан,/ и объяти плотию крещаема Зиждителя://Егоже благословят людие и превозносят во все веки.
Удобрившися добродетельми, украсилася еси добротами мучения/ и Жениху обручилася еси, паче всех человеков краснейшему,//добротою сияющему бессмертия, Татиане богомудрая.
С бесплотными слугами в темнице Творца славословила еси,/ сияющи славою Божественнаго блистания//и всем неприступна пребывающи, держимым тьмою прелести.
Сокрушение твоих удес истни врагов коварства,/ кровей течение нечестия лютыя потоки, честная, иссуши,//пучина чудес нам явльшися.
Богородичен: Спаси, ущедри ны,/ щедраго Бога нам Спаса рождшая паче слова,/ огнепальных помышлении и страстеи изымающи зноя Твоими молитвами,//Чистая, Препрославленная.
Катавасия:В пещь огненную ко отроком евреиским снизшедшаго/ и пламень в росу преложшаго Бога,//поите дела, яко Господа, и првозносите во вся веки.
 
Песнь 9
Ирмос:Недоумеет всяк язык благохвалити по достоянию,/ изумевает же ум и премирный пети Тя, Богородице,/ обаче Благая сущи, веру приими,/ ибо любовь веси божественную нашу://Ты бо христиан еси Предстательница, Тя величаем.
По многих муках мечным тя судом лютый осуждает судия,/ еяже восхождению восплескаша Небеснии чини.// Христос же всесильною десницеи венча тя, мученице, законно пострадавшую.
Сочетася с мученическими светлейшими стады,/ яснейши приближившися Богу, видиши, яже видят Ангели,/ яко, дева, в чертозе водворяешися, Жениха твоего, честная,//молящи спастися любовию тя почитающим.
Запечатанный источник тя, заключен же оград,/ возложение честно и священно, невесту Христову нетленную,/ заколение и жертву, агницу и добрую голубицу Владыки всяческих,//Татиано, проповедуем.
Богородшен: Гласы преклоняема тепле Тя молящих,/ Едина верных Прибежище, спаси, ущедри, Владычице,/ соблюди от вреда и всякаго языков нашествия//верою и любовию присно Тя величающия.
Катавасия:От Бога Бога Слова,/ неизреченною мудростию пришедшаго обновити Адама,/ ядию в тление падшаго люте,/ от Святыя Девы неизреченно воплотившагося нас ради,//вернии, единомудренно песньми величаем.
Светилен
Яко невеста украсилася еси добротою, обручившися Жениху страстьми добротворными: внутрь же чертога световидна, яко избранная вселилася еси, носящи свечу девическую, и ныне царствуеши с Живущим во веки, Татиано, сияющи.
Слава, и ныне:
Подобен: Посетил ны:
Явися Спас, Благодать и Истина во струях Иорданских,/ и сущия во тьме и сени снятия просветил есть,// ибо прииде и явися Свет Неприступный.
Стихиры на хвалитех, на 6, глас 6:
Подобен: Ангельския:
Стих:Сотворите в них суд написан,/слава сия будет всем преподобным Его.
Сияние от Света, Свет сый Иисусе мой,/ просветил еси нас неизреченным Твоим осиянием,/ прежде ослепленныя во Эдеме от змия,/ во Иордане ныне Свет вси Светом Твоим зряще, верно поем: благословен явлейся, Боже наш, слава Тебе.
Стих:Хвалите Бога во святых Его,/ хвалите Его во утвержение силы Его.
Таинниче и страшных строителю таин,/ Предтече радости и Духа самовидче,/ крещшагося Слова от тебе, яко благоволи,/ проси нам согрешении избавление присно подати, емуже поем:/ благословлен явлейся, Боже наш, Слава Тебе.
Стих:Хвалите Его на силах Его,/ хвалите Его по множеству величествия Его.
Вознесем, вернии, в разуме сердца,/ потецем со тщанием к струям Иорданским,/ и увидим Зиждителя, плотски крещаема от Иоанна Предтечи,/ и с ним благословяще воспоим:// благословен явлейся, Боже наш, слава Тебе.
Глас 3
Стих: Хвалите Его во гласе трубнем,/ хвалите Его во псалтири и гуслех.
Страдальческое торжество вернии,/ богомудренно совершаем видяще,/ чудному в советех Богу нашему,/ благодарственное песнопение воспоим:/ невидимую державу противныя силы/ в женстем естестве победи,/ и Божественную свою силу/ в немощи совершив добромученицы://спасает души наша.
Стих: Хвалите Его в тимпане и лице,/ хвалите Его во струнах и органе. Истины чашу от своих кровей страдальческих,/ всехвальная мученица Татиана, растворивши,/ и сию всгда предлагающи церкви,/ к ней же церковныя питомцы мудрости гласом созывает, глаголюще:/ почерпните пиво, воскресения свидетельное,/ неверных прогонительное и страстеи чистительное,/ благочестивым же душам хранительно,/ Спасу зовуще: напоивый нас потоком сладости духа, спаси души наша.
Стих:Хвалите Его в кимвалех доброгласных, хвалите Его в кимвалех восклицания./ Всякое дыхание да хвалит Господа.
Иже кровию Христовою/ души запечатавше в день избавления,/ кровь святую от мученическаго источника востекающую нам/ с веселием духовным пророчески почерпнем,/ животочных страстей Спасовых,/ и присносущныя славы образовательну./ Темже Ему возопиим:/ прославляйся во святых Твоих, Господи,/ преславныя Твоея страстотерпицы молитвами,// спаси души наша.
Слава, глас 6:
Страдальческим шествовавше путем,/ мучительскаго избежала еси совета, Татиано всечестная,/ яко дева, убо мудра,/ свещу носящи вошла еси во дворы Господа твоего:/ яко мученица мужеством,/ благодать прияла еси исцелити плотския страсти./ Но и нас воспевающих тя,/ душевных болезнеи избави /яже к Богу мольбами твоими.
И ныне, глас той же
Подобен: Ангельская:
О паче ума Божественнаго смотрения,/ како Творец твари предста/ и предклоняет сему главу,/ указанием бо нам образ смирения вводит,/ иже о Нем просвещенным Емуже поем://благословен явлейся, Боже наш, слава Тебе.
На Литургии
Прокимен, глас 4:Благословен грядый во имя Господне,/ Бог Господь и явися нам.
Стих:Исповедаитеся Господеви, яко Благ,/ яко в век милость Его.
Прокимен, глас 4:Дивен Бог во святых Своих,/ Бог Израилев.
Стих:В церквах благословите Бога от источник Израилевых.
Апостол к Коринфяном (зачало 181): Братие, споспешествующе молим, не вотще благодать Божию прияти вам. Глаголет бо: во время приятно послушах тебе, и в день спасения помогох ти, се ныне время благоприятно, се ныне день спасения. Ни едино ни в чемже дающе притыкание, да служение беспорочно будет. Но во всем прдставляюще себе якоже Божия слуги: в терпении мнозе, в скорбех, в бедах, в теснотах, в ранах, в темницах, в нестроениих, в трудех, в бдениих, в пощениих, в очищении, в разуме, в долготерпении, в благости, в Дусе Святе, в любви нелицемерне, в словеси истины, в силе Божиеи, оружии правды, десными и шуими, славою и бесчестием, гаждением и благохвалением: яко льстецы и истинни, яко незнаеми, и познаваеми: яко умирающи, и се живы есмы: яко наказуеми, а не умерщвляеми, яко скорбяще, присно же радующеся: яко нищи, а многи богатяще, ко ничтоже имуще, а вся содержаще.
Аллилуиа, глас 4:
Стих 1:Принесите Господеви сынове Божии,/ принесите Господеви сыны овни.
Стих 2:Терпя потерпех Господа,/ и внят ми и услыша молитву мою.
Евангелие от Луки, (зачало 106):Рече Господь своим учеником: внемлите от человек, возложат на вы руки своя, и ижденут, предающе на сонмища и темницы, ведомы к царем и владыкам, имене Моего ради. Прилучится же вам во свидетельство. Положите убо на сердцах ваших не прежде поучатися отвещевати: Аз бо дам вам уста и премудрость, еи же не возмогут противитися или отвещати вси противляющиися вам. Предани же будете и родители и братиею и родом и друга, и умертвят от вас. И будете ненавидими от всех имене моего ради. И влас главы вашея не погибнет. В терпении вашем стяжите душы ваша.
Задостоиник
Величаи душе моя, Честнеишую горних воинств,/ Деву Пречистую Богородицу.
И ирмос: Недоумеет всяк язык: стр.8
Причастен:
Явися благодать Божия, спасительная всем человеком.
Радуитеся, праведнии, о Господе, правым подобает похвала.

 

 
Православный календарь
Проект храмового комплекса
maket1
maket2