Акафист святой мученице Татиане

Избранней невесте Христовей, похвальная пения восписуем, чистоту жития твоего девственнаго восхваляюще, и лобызающе честная страдания твоя: ты бо ныне ликуеши в чертозех Небеснаго Твоего Жениха Христа. Молися выну о прославляющих тя, да безпрепонно сподобимся небеснаго царствия, взывающе ти благодарственно:

Радуйся, благоуханный цвете девства, славная мученице Татиано.

Ангелов Творец избра тя из древняго Рима, да ангельское житие наследиши, и святое имя Божие на земли прославиши. Ты же, из млада навыкнув страху Господню, «злобою младенствовав, умом же совершенна»* бывши, предызбрание сие не посрамила еси, добродетельми обогатившеся, сего ради зовем ти:

Радуйся, Бога миру предпочетшая,
Радуйся, денно и нощно Ему служившая,

Радуйся, ангельски на земли пожившая

Радуйся, юнице сладкоуханная,
Радуйся, яко девство и целомудрие в себе сочетавшая,

Радуйся, паче земных благ вечная возлюбившая,

Радуйся, Христу любовию пламеневшая,
Радуйся, благоуханный цвете девства, славная мученице Татиано.

Видя, дщери своея житие преславное, благочестия рачитель, родитель твой, паче бо знатности своея, и власти консульския, Христа чтяше, с тобою тожде на всяк день хвалу Богу  пояше: Аллилуия.

Разум небесный озари тя, егда юности достигшей, девства и целомудрия возжелела еси, постом и молитвою плоть умертвила еси, духу поработивши, день и нощь с ревностию велиею Богу служила еси; сего ради приими от нас похвалы сия:

Радуйся, лилие Божественнаго сада, Богоначертанно миру процветшая,

Радуйся, Божественному Писанию от родителя твоего научившаяся,
Радуйся, благочестие от него себе воспрявшая,
Радуйся, плоть духу поработившая,
Радуйся, молитвою и Боговещанием житие твое наполнившая,

Радуйся, смерти временныя не убоявшаяся,
Радуйся, в бедах и нуждах отраду подающая,

Радуйся, благоуханный цвете девства, славная мученице Татиано.

Сила Божественная содела тя служительницу изрядную Церкви Христовой, избранней бывшу ти на славное диаконисс служение, с нелицемерною ревностию, в радости велией, Богу и ближнему служила еси, возглашая непрестанно: Аллилуия.

Имущи ревность Божию, ангелом подобящяся, немощь женскую отвергше, всю себе службе искренняго отдавши, доброплодно прешла еси жития земнаго путь. Мы же, отягченнии грехми, дивящеся подвизем твоим сице глаголем:

Радуйся, яко диаконисою церкви послужившая,
Радуйся, в темницах узников посещавшая,
Радуйся, добропобедное постничества правило,
Радуйся, ревность по Бозе ангелам подобную показавшая,

Радуйся, правоверия цевнице добрая,
Радуйся, яко и ныне к Богу молитвою благоухаеши,
Радуйся, не оставляющая нас помощию своею,
Радуйся, благоуханный цвете девства, славная мученице Татиано.

Бурю злых напастей претерпе род христианский, егда Ульпиану епарху Александра Севера именем, грамоту издавшу, «галилеян», римских богов отметаюших, мучити повелено бысть. Приспе время и тебе, славная мученице, яве лесть идольскую житием твоим посрамити, воспевая Богу: Аллилуия.

Видяще житие твое непорочное и веру неколеблему в Бога Истиннаго, ведоша тя мучителие в Апполонов храм, нудяше поклонитися ему, яко богу. Пришедшу ти, молитвою твоею трус бысть велик, идоли падоша, и волхвы нечестивии изомроша. Демон идольский не терпяше Духа Святаго благодати, в тебе бывшей, с плачем велим бежаше по воздуху. Сего ради мы  зовем ти:

Радуйся, Ульпианова прещения не убоявшаяся,
Радуйся, яве лесть идольскую житием твоим посрамившая,

Радуйся, Апполонову немощь молитвою показавшая,
Радуйся, жрецов нераскаянных Силою Божиею наказуя наказавшая,

Радуйся,немощь диавольскую яве всем явившая,
Радуйся, тобою бо капище безбожное распадеся,

Радуйся, яко тобою Богознамение* насадися
Радуйся, благоуханный цвете девства, славная мученице Татиано.

------------

Божественный ангельский свет выну осиявал тя, Богославная* мученице, егда терпящу ти страсть, мучителие твои, паче тя, мучения подимаша. Ангели бо невидимо предстояху ти, видимо же мучителей твоих уязвляху. Тии же вопиша к судии, да престанут тя терзати, понеже муце большей подвержены быша. Ты же, Богоглаголивая, воспевала еси Христу, вся благоустрояющему: Аллиллуия.

------------

Возсия свет Христов молитвами твоими, в воинех, тя мучивших; узрев бо четырех ангелов, окрест стоящих, глас с небесе слышав, падоша на землю пред тобою, моляся простити содеянная ти, понеже несть нашея воли, глаголя, на страдание твое. Крещшеся же кровию своею, мечем за Христа усечение прияша. Мы же радуяся обращению заблудших, воспеваем тя сице:

Радуйся, Ангелов служити ти сподобившаяся,

Радуйся, воинов на путь спасения страданием своим приведшая,

Радуйся, крещению их кровию, мучением твоим послужившая,

Радуйся, приведшая их в воинство небесное,
Радуйся, осмь воинов страданием за Христа венчавшая,
Радуйся, тобою бо идолопоклонницы посрамишася,
Радуйся, тобою бо Единому Богу покланятися, научишася,
Радуйся, благоуханный цвете девства, славная мученице Татиано.

Проповедуем любовь велию твою ко Христу. Ты бо подвиги низложи идольское зломыслие, молитвою мучителей посрамила еси. Егда коготьми железными терзаша тя; тело же твое силою Божественною, пребысть наковальни крепльши. Дивящеся таковому Боговоинственному* терпению твоему, вопием: Аллилуия.

----------

 

Другому дневи наставшу, седе судия нечестивый, паки тя идолом поклонитися увещати. Зрящи верность твою Богу Истинному, тело же твое здраво, лице светло и радостно, повеле воим своим паки мучити тя. Ангели такожде предстояху ти, поражая мучащих тя. Ты же моляся о распинающих, судию обличала еси, яко боги ваша безчувственнии идолы суть. Мы же восхваляюще таковыя о тебе чудеса Божии, зовем:

Радуйся, яко страданием своим, ко Христу возводящая,
Радуйся, Ангелы охраняемая, и блажимая,
Радуйся, мучителей устрашившая и удивившая,
Радуйся, яко тело твое Богозарным* соделася,
Радуйся, безпутие мучителем показавшая

Радуйся, Богодельно** страдания своя на мучителей перенесшая,
Радуйся, доблемудренно*** на страсть свою текшая,

Радуйся, благоуханный цвете девства, славная мученице Татиано.

--------

Новаго Богознамения свидетели быша, мучителие твои, егда тело твое источаша вместо крови млеко; нагое же, мучений ради, и ножем секомое, источаше благоухание, яко от сосуда благовоннаго. Негодующе о таковем твоем терпении, распростреша тя нечестивии, креста образом на земли, и биша жезлы железными. Ты же негневодержанной*бывши, моляся за мучащих тя, воспевала еси: Аллилуия.

---------

Странное чудо видим на тебе, всеблаженная, како в темнице нощию молящися, и Христу хвалы воспевающи, Небеснаго света сподобилася еси озарения, и Ангелов Божиих купно с тобою славословящих Начальника Жизни, цельбу телу твоему даровавшему, да сею временною мукою, живот нескончаемый наследиши, идеже несть страданий, но жизнь всесветлая. Сего ради яко причастнице бытия всечуднаго*, вопием:

Радуйся, живота нетленнаго наследнице,
Радуйся, добропобедный сосуде немощнейший,

Радуйся, юнице Богоревнивая,
Радуйся, молитвою присно пламеневшая,
Радуйся, цевнице веры благожребие** глашающая,
Радуйся, благодушествовати нас в злостраданиих научающая,

Радуйся, к горним нас житием своим выну подвигающая,

Радуйся, благоуханный цвете девства, славная мученице Татиано.

---------------

Всесмехливый* епарх, егда паки узре тя здраву и Богозарну, извед из темницы на беззаконное судище, нудяше тя  божеству римскому -Диане поклонитися; ты же, совету мучителя противящяся, верою вооружшеся, креста знамением, молитву вознесла ко Господу, да паки и паки яве идолы посрамит. Демон же не можаше терпети твоего богоблагодатная пришествия, вопияху, камо пойду от Духа Твоего, Боже Небесный, яко огнь снедает мя и прогоняет. Ты же Татиано, славяще Господа Саваоффа, взывала еси: Аллилуиа

------------

Все естество ангельское и человеческое удивися Богодейственней* силе молитвы твоея, егда огнь с небесе сшедый, попали множество, Бога Истиннаго, отвергшихся, жертвище же их безбожное, распадеся, предпоказуя владычество Царя небесе и земли.Тем же приими от нас, Богоблаженная, победительную песнь, вопиющих:

Радуйся, лести епарха не внявшая,
Радуйся, в храм Дианы благодерзостне** вшедшая,
Радуйся, молитвою огнь с неба низведшая

Радуйся яко сим оружием всемощным, жертвище Дианы разрушившая,
Радуйся, яко бесы присутствия твоего трепетаху и бежаху,
Радуйся, владычество Царя небеснаго нечестивым явившая,
Радуйся, креста знамением бесов победившая,
Радуйся, благоуханный цвете девства, славная мученице Татиано.

-----------

*  «силе»- от Божественного могущества или действия

Ветии многовещаннии не возмогут восхвалити тя по достоянию, богокрасная мученице, кто бо возможет величие страданий твоих и силу веры твоея изрещи? Кто подвиги твоя и Боговещание* воспоет достойно? Немощным сосудом сущи, Богодейственно укрепляема, 

непрестанно Боговещала еси: Аллилуиа

--------------

Стена и адамант была еси, егда на растерзание зверем яша тя безсердии мучителие.

Напустиша бо на тя льва свирепаго. Ты же благодерзостне стала к страсти сей. Лев же узрев Боговместивный сосуд и Богозданный, лагодяше* тя. Абие же на Евмения сановника устремися, и разтерза его.Сего ради Боголюбезней дщери Адамовей глаголем:

Радуйся, добротворения зрак стяжавшая,

Радуйся, Боговместивный сосуде и Богозданный**,

Радуйся, Богоревнивая*** дщерь, власть над тварью, Адамову, от Бога приявшая,

Радуйся, безстрастием твоим, льва свирепость угасившая,

Радуйся, сановника нечестиваго смертию Богосудною****, Богознамение всем показавшая,

Радуйся, Царствия Небеснаго богоблаженная наследнице,

Радуйся, отонудуже прошением нашим внемлющая,
Радуйся, благоуханный цвете девства, славная мученице Татиано.

-------------

Не хотяше утешитися мучителие твои, ввергоша тя в огнь, ты же Силою Христовою угасила еси пламень огненный, непрестанно Боговещая. Нечестивии же знамения сии напеванию* присвидетельствоваша, рекше, яко художество волшебное власы твои имут. Остригше же тя, заключиша в Зевса храм, хотяше божеством своим устрашити тя. Ты же непрестанно молитвы дея, взывала еси: Аллилуиа

-------------

По днех триех заключения твоего, приидоша испытующи тя, да пожрут согласно с тобою Зевсу своему. Отверзше же храмину пребывания твоего,  повержена бога своего зряху, тебе же Богозарне пребывающей, паки на судище приведоша. Не терпяще же твоего славнаго зрака, на усечение мечное осудиша тя. Сего ради страстотерпице Богожренней* вопием:

Радуйся, прелесть зевсову отметавшая,

Радуйся, огня пламень силою Божиею угасившая,
Радуйся, в волхвовании оклеветанная,
Радуйся, демонострашия** не убоявшаяся,

Радуйся, от бесовскаго прилога нас сохраняющая,
Радуйся, яко мысляху нечестивии, во власех твоих обавание,
Радуйся, яко и по острижении власов, Богознамение показавшая и богомерзких посрамившая,

Радуйся, благоуханный цвете девства, славная мученице Татиано.

-------------

Отрасль Богопрозябная* и доброплодная была еси родителя твоего Богозваннаго, жребия мученическаго с тобою приобщившагося. Сице бо уведев беззаконницы исповедание его, земнаго стяжания и чина его лишиша, неведающи, яко небеснаго царствия и чина высшаго, абие сподобиша его. Тем же двоице святая жаждая со Христом соединитися и в царстве Его быти, доблемысленне** воспеста: Аллилуиа.

-----------

Светозарная свеща была еси житем твоим, мученице Богосветлая*, озаряя Богоразумия светом неверных сердца, да обрящут Зиждителя твари Истиннаго. Сего ради славяще твое Боговещание, умиленно вопием:

Радуйся, яко земное стяжания отец твой презре, к небеси себе и тебе устреми,
Радуйся, на страсть родителем твоим благословенная,
Радуйся, в смерти с  ним неразлучившаяся и Царство купно наследовавшая,
Радуйся, чертогов Отца Небеснаго совсельнице,

Радуйся, светлосте Богозарная во зле лежащим сияющая,
Радуйся, сердца наши огнем Божественным вжигающая,
Радуйся, идолы наши попирающая,
Радуйся, благоуханный цвете девства, славная мученице Татиано.

--------------

Спасительнаго твоего подвига зряще великодействия*, восхваляем страдания твоя; ты бо заушение, огнем опаление, тела изсечение и жезлобиение, осмеяние, в темнице заключение и ины злострадания, Богомудренно претерпела еси, ныне же, венцем Царствия Небеснаго венчавшися, со всеми святыми песнопоеши: Аллилуия.

--------

Одесную Спаса представши, страстотерпице добропобедная, добродетельми одеянна, и преукрашенна елеем чистоты, с воинствы архангел и ангел, апостол же, пророк и мученик,Божественнаго веселия, молитвами твоими, и нас соделай причастники, вопиющих ти сице:

Радуйся, Богокрасная голубице, к небеси возлетевшая,

Радуйся, со Христом сочетавшаяся,
Радуйся, со апостолы ликующая,
Радуйся, со святыми мученики хвалу Богу возносящая,
Радуйся, не лишающая и нас небесныя радости твоея,
Радуйся, молитве прилежной нас научающая,
Радуйся, яко Христу сораспявшаяся, доблественница*,

Радуйся, благоуханный цвете девства, славная мученице Татиано.

-----------

О, всеславная и великоименитая добромученице Татиано! Девства и чистоты сосуде златый! Украшена ранами твердаго твоего страдания, благолепие и доброту краснуювидети сподобилася еси жениха твоего Христа, Иже сугубым венцем увязе тя, и постави одесную себе яко царицу испещрену.Того моли, мученице Богославная, певцем твоим душетленных прегрешений, избавитися, жизнь небесную улучити, вопиющих: Аллилуиа

 

О, святая достодивная мученице Татиано, невесто Сладчайшего Жениха Твоего Христа! Агнице Агнца Божественнаго! Голубице целомудрия, благоуханное тело страданьми яко одеждами царскими одеявшая, к ликом небесным сопричтенная, от дней юности служительнице Церкве Божия, целомудрие соблюдшая и паче земных благ Господа возлюбльшая! Тебе ныне просим: внемли воздыханиям нашим сердечным и не отвержи молений наших, даруй чистоту души, и телу здравие на благодетельство, вдохни рачение к истинам Божественным, на пути добродетельнем веди нас, ангельское охранение испроси у Бога нам, юность целомудренну утверди и огради, старость безбедну и доброхвальну и богомысленну даруй, в смертнем часе помози доити царствия небеснаго непреткновенно, поминай наши скорби и отраду даруй, посети нас в темнице греха сущих и на покаяние скоро изведи, возжи пламень молитвы и не остави нас грехми отягченных, да славяще  честная страдания твоя, воспоем прославльшаго тя Сына Божия, Ему же подобает всякая слава честь и поклонение со Безначальным Его Отцем и Пресвятым и Благим и Животворящим Духом, ныне, и присно, и во веки веков. Аминь.